Yangiliklar

Oʻzbekiston va Xitoy raqamli transformatsiya platformasini yaratadi

Shanxayda O‘zbekiston Respublikasi investitsiyalar, sanoat va savdo vaziri o‘rinbosari Ilzat Qosimov Xitoy Xalq Respublikasi sanoat va axborotlashtirish vaziri o‘rinbosari Szin Jichzun bilan uchrashib, raqamli transformatsiya, sun’iy intellektni joriy etish va sanoatni modernizatsiya qilish bilan bog‘liq masalalarni muhokama qildi.

Tomonlar raqamli texnologiyalar, aqlli yechimlar, katta maʼlumotlarni qayta ishlash va bulutli hisoblash sohasida hamkorlikni kengaytirish imkoniyatlarini oʻrganib chiqdilar. Sanoatni raqamlashtirish, ishlab chiqarish jarayonlarini avtomatlashtirish bo‘yicha tajriba almashish, qo‘shma texnologik platformalar yaratishga alohida e’tibor qaratildi.

O‘zbekiston tomoni “Raqamli O‘zbekiston – 2030” strategiyasi doirasida IT infratuzilmasini rivojlantirish, innovatsion startaplarni qo‘llab-quvvatlash, yuqori malakali mutaxassislar tayyorlashga qaratilgan tashabbuslarni taqdim etdi.

Ta’kidlanganidek, mamlakat Xitoy kompaniyalari bilan qo‘shma loyihalarni, jumladan, intellektual hisoblash markazlarini yaratish va sanoat buyumlar internetini rivojlantirishni faol ilgari surmoqda.

Muzokaralar yakunida tomonlar Xitoy Sanoat va axborotlashtirish vazirligi va Markaziy Osiyo davlatlarining tegishli idoralari o‘rtasida hamkorlik to‘g‘risidagi memorandumni imzolashga tayyor ekanliklarini tasdiqladilar.

Ushbu hujjat mintaqada yagona raqamli makonni shakllantirish va mamlakatlar oʻrtasida texnologik hamkorlikni mustahkamlash yoʻlidagi muhim qadam boʻladi.

Manba